دليلك للأبعاد العلوية

أكيد أنت في يوم من الأيام سألت عن ماهية العالم اللي احنا عايشين فيه.. كتير أوي بتسمع اننا عايشين في عالم ثلاثي الأبعاد، وإن أينشتاين بيقول انه الفضاء رباعي الأبعاد ومش عارف ايه.. وطول عمرك كنت نفسك تفهم وتبص للموضوع بنظرة مختلفة..

ده غير إن في قناعاتك الشخصية المتكونة بناءً على الدين اللي انت مؤمن بيه، سواء كنت مسلم أو مسيحي أو يهودي حتى، بتقول إن هناك خالق.. كيان إلهي علوي قدير، يرانا جميعًا ولا نراه.. طب إزاي؟

إزاي الجن والملايكة وكل الكائنات الأخرى اللي اتكلم عنها القرآن دي مبتقدرش نشوفها برغم انها بتقدر تشوفنا عادي؟.. وإزاي هي عندها القدرات الخارقة اللي اتحكى عنها في القرآن دي؟.. قصة سيدنا سليمان مع الجن مثلًا؟!..

النهارده خليني أحاول أجاوب على أسئلتك بأكبر قدر ممكن من التبسيط.. ولكن لازم هحذرك تحذير بسيط.. المقال ده مش للمنغلقين فكريًا، ولا للمتشددين دينيًا خالص.. وهو بيتطلب أكبر قدر ممكن من الخيال و توسع الإدراك والفهم.. يعني باختصار الناس اللي شعار حياتها إنهم مش هيفكروا عشان التفكير حرام، ميكملوش قراية..

تمام؟.. يالا بينا..

أول حاجة لازم نفهمها هو يعني ايه البعد أو ال Dimension ده اصلا؟.. يعني ايه احنا عايشين ف عالم ثلاثي الأبعاد ؟..

خليني أشرحلك ببساطة، وتعالى نبدأ من الأول..

البعد الأول اللي هو ايه ؟.. هو ميعتبرش بعد أصلًا، ومفيش كائنات ممكن تعيش فيه أو تستوعبه لإنه ناقص.. البداية من البعد الثاني أو ثنائي الأبعاد 2D.

طب يعني إيه 1D أو أحادي الأبعاد؟..

يعني طول بس.. أو عرض بس.. المهم انه خط واحد بس زي ده كده ——-

يعني لو معاك ورقة وقلم مثلا، إرسم عليها خط واحد كده.. ده كده البعد الأول..

طب حلو.. إيه بقى البعد التاني ده؟.. ركز معايا أوي..

البعد التاني، أو (أي بعد علوي عمومًا) لازم يبقى خط متقاطع مع خطوط البعد الأقل منه، بزاوية ٩٠ درجة..

يعني لو افترضنا إنك قدامك دلوقتي الورقة اللي انت رسمت عليها الخط الأولاني، عشان تقدر تتخيل البعد الثاني، هتحتاج إنك ترسم خط تاني يتقاطع مع الخط الأول ده بزاوية ٩٠ درجة..

زي كده مثلا ______|

طب تمام.. حلو أوي..

كبر بقى البعدين دول، وطبقهم على مستوى أكبر شوية.. هتلاقي ان العالم ثنائي الأبعاد ده هو شبه الورقة كده اللي انت بترسم عليها.. فيه طول وعرض بس، لكن مفيش ارتفاع.. يعني لو افترضت انه فيه كائنات عايشة فيه، ف هما هيبقوا متكونين من طول وعرض بس، ومفيش اصلا وجود لمصطلح الارتفاع في عالمهم.. يعني مش هيقدروا يبصوا لفوق أو تحت أصلًا، ببساطة لإن الإتجاه ده مالوش وجود في عالمهم مفيش سُمك أو Thickness..

دماغك لفت ؟.. معلش.. أصبر بس وهتفهم..

طيب تعالى نتكلم عن الموضوع بوجهة نظر ممتعة شوية ونتخيل اننا بنحكي قصة مثلًا.. تخيل مثلًا إن العالم الثنائي الأبعاد بتاعك ده هو نفسه الورقة اللي قدامك دلوقتي.. وتعالى نتخيل إن في كائنات حية عايشة عليها.. تفتكر الكائنات دي هيبقى شكلها عامل ازاي ؟..

هتبقى مبططة كده شبه الدواير مثلًا أو المربعات أو المثلثات أو أي شكل هندسي بسيط ثنائي الأبعاد عارف ان اللي أنا بقوله هو جنون، بس استحمل معايا معلش شوية و زق معايا اليوم عشان تفهم..

طب مثلا تخيل إن المثلث بيحب الدايرة وعايز يتجوزها.. بس هو ميعرفش إن الدايرة جواها نقطة صغيرة.. النقطة دي مثلًا هي مرض جوه جسم الدايرة.. فيروس أو كانسر ثنائي الأبعاد مثلا.. تخيل معايا إن الدايرة مش عايزة تقوله عشان متجرحوش، بس هي عارفة انها هتموت كمان شهر.. ف رفضت تتجوز المثلث ومقالتلوش انها عيانة عشان مش عايزة شفقة من حد..

طبعًا المثلث إتضايق فشخ وعمل زي تميم يونس وراح إتجوز دايرة تانية، وفضل رايح جاي قدامها يغيظها ويقولها عشان تبقى تقولي لأ .. طبعًا الدايرة قعدت تعيط وتشكي حالها لربنا، لإنه هو اللي عارف اللي جواها..

طب إزاي بقى ربنا عارف اللي جواها؟.. ركز معايا جدًا، وإستحمل الصدمة اللي جاية..

عشان ربنا هو كيان علوي كلي القدرات والمعرفة، موجود فوق الأبعاد اللي احنا نعرفها كلها.. في بعد علوي أكبر من كل ده..

تعالوا نفترض -لمجرد الفرض مثلًا- إنه ثلاثي الأبعاد.. يعني زينا كده احنا البشر.. عندنا طول وعرض وارتفاع. وبالتالي احنا مجسمين.. بنقدر نبص يمين وشمال وفوق وتحت..

لو هتتخيل البعد الثالث، أو ال 3D، بردو زي ما علمتك.. هتجيب الخطين اللي انت رسمتهم دول، وترسم واحد تاني يتقاطع مع الخطين دول بزاوية ٩٠ درجة، بس من اتجاه جديد مفيش خط تاني موازي له..

بس انت لو راسم مربع، هتحتاج ترسم خط جديد من كل نقطة تقاطع بين ضلعين، أو من عند كل زاوية للتبسيط.. هترسم خط من عند كل نقطة زوايا، بزاوية تسعين، في إتجاه جديد..

بالتالي هتلاقي المربع الصغير بتاعك ده إتحول لمكعب

يعني الكائن بتاعك بدل ما هو مربع أو مثلث، هتلاقيه فجأة بقى مكعب أو هرم.. ولو تخيلت انك هتشكله على شكل كائن حي معروف ليك، تخيل بقى انه بقى انسان أو كلب أو قطة..

فبالتالي لو هنتخيل أو نفترض -لمجرد الفرض والله عشان محدش يتهمني بالإلحاد- إن الدايرة العيانة اللي عندها كانسر دي وهي بتعيط، قعدت تدعي لربنا في مفهومها هي، عشان هو اللي عارف اللي جواها.. هي هتبقى ان ربنا بتاعها ده، هو الكائن اللي عايش في البعد الأعلى منها.. يعني زيك انت مثلًا وانت بتقرا المقال ده

هتسألني ليه.. هقولك عشان أنت كبشري عندك استيعاب للأبعاد الثلاثة (الطول Length والعرض Width والإرتفاع Height).. فبالتالي انت شايف الدايرة وهي عايشة على الورقة اللي انت رسمتها عليها.. ومش بس شايفها، لأ انت شايف النقطة اللي جوه الدايرة، اللي هي الكانسر اللي عندها اللي إحنا افترضناه ده..

عارف ليه؟.. عشان انت عندك استيعاب للإرتفاع وبتقدر تشوفه.. بل -وركز معايا أوي- بتقدر تتحرك فيه لقدام ولورا.. تقدر تركب طيارة وتطير مثلا وترتفع لفوق، أو تركب غواصة وتنزل لتحت.. مش محصور في خط واحد ثنائي الأبعاد..

فبالتالي انت بتبقى باصص للدايرة من إتجاه غير موجود في عالمها ثنائي الأبعاد ده يعني انت شايفها من فوق.. بس هي متعرفش انك شايفها ولا قادرة تبصلك، لإنها متعرفش تبص لفوق أصلًا.. هي اصلا متعرفش يعني ايه كلمة (فوق) أو (تحت).. دول مش في قاموسها أصلًا.. فبالتالي لو هي بتدور عليك وهي بتعيط، هتكون بتبص يمين وشمال بس.. مش عارفة تبصلك تشوفك وهي بتدعيلك (باعتبارك أنت الإله أو الرب بتاعها زي ما افترضنا).. لكن انت شايفها، وشايف اللي جواها، وعارف كل حاجة بتدور في العالم بتاعها في وقت واحد، عشان انت شايفه من فوق.. من منظور عين الطائر Bird’s Eye View..

يعني انت بالنسبة للدايرة دي، أنت كائن فائق القدرات كامل المعرفة..

لحد هنا فاهمني؟.. طب جميل.. خليني أسألك سؤال بقى..

هل أنت فعلًا كائن كلي المعرفة خارق القدرات؟.. طبعًا انت عارف إن الإجابة لأ بس لأ ليه؟!!

عشان انت كل اللي بتقدر تستوعبه محدود بقدرتك على استيعاب الأبعاد الثلاثة بشكل كامل.. سواء طول أو عرض أو إرتفاع.. طب هو الكون بيتكون من الأبعاد الثلاثة دول بس؟..

الإجابة هي لأ.. وخليني أحكيلك ليه..

زمان أوي، في بدايات القرن العشرين، جه العبقري أينشتاين Einstein وحط نظريته الأكثر شهرة في تاريخ الفيزياء.. النظرية النسبية العامة General Relativity.. وفي النظرية دي زي ما معظمكم عارفين، هو أضاف بعد رابع للأبعاد الثلاثة اللي احنا عارفينها.. البعد الرابع ده هو الزمن Time..

والبعد الرابع ده هو مع الأبعاد الثلاثة الأوائل، بيتحدوا مع بعض عشان يكونوا شكل غريب للكون.. شكل فريد من نوعه محدش كان متصوره حتى قبل أينشتاين..

الشكل الفريد ده، أينشتاين قال عليه: النسيج الكوني أو (الزمكان Space-time).. وبناءً على تصورنا ليه، فهو خلي الكون نفسه أو الفضاء اللي احنا بنشوفه ده، عامل زي المرتبة مثلا كده.. هو نسيج واحد متكامل، متكون من الأبعاد الأربعة المحسوسة دي، اللي هي الطول والعرض والارتفاع والزمن..

الكواكب والنجوم نفسها موجودة على المرتبة دي.. والتقل بتاعها أو الكتلة Mass، كل ما بتكون تقيلة، كل ما الوزن ده بيأثر في المرتبة أكتر، وبيخلي الكوكب أو النجم ده يحني نسيج المرتبة نفسها لتحت.. وهو ده اللي بيخلق احساس الجاذبية اللي احنا بنشوفه ده..

الشمس مثلا تقيلة وكتلتها كبيرة، ف بتحني الفضاء أو المرتبة لتحت، وبالتالى الكواكب اللي بتلف حواليها بتلف في الحتة المنحنية دي، مش عارفة تخرج منها.. هو ده اللي بيسموه المدار أو ال Orbit..

طبعًا كل دي معلومات أساسية Basic ومعروفة لأي حد قرأ شوية في الفيزياء.. وأنا نفسي اتكلمت عنها كتير في كتابي الأكثر شهرة وقراءة #الله_لا_يرمي_النرد.. هتلاقوه في المكتبات وموجود PDF على النت لو حابين تقرأوه.. أنا مسامح متخافوش

طب ايه علاقة كل ده بموضوعنا؟!.. العلاقة وثيقة وهفهمك ايه هي..

تعالى معايا كده نحاول نتخيل البعد الرابع أو ال 4D ده..

إحنا قلنا إن عشان نقدر نطلع من بعد سفلي لبعد علوي، هنحتاج اننا نرسم خط متقاطع مع جميع أضلاع البعد السفلي أو ال Lesser Plain بزاوية ٩٠ درجة، بس في اتجاه جديد وغير معروف..

طب لو تخيلتها كده.. هتلاقي انك مش هتعرف ترسم خط في زاوية ٩٠ درجة من زوايا المكعب جرب كده وهتلاقي نفسك مش هتعرف..

طب ليه؟.. عشان أنت عايش في البعد التالت.. مش مؤهل لإنك تشوف الرابع (اللي هو الزمن) أصلًا.. انت فقط بتحس بمروره عليك، وهو اللي بيخلق عندك احساسك الزائف بالوقت أو زي ما علماء الفيزياء بيسموه The Illusion of time..

ثانية.. هو الوقت وهم ؟!!

أيوه عزيزي القاري.. الوقت أو الزمن هو مجرد وهم أنت بتحس بمروره عليك بس، عشان انت بتتحرك فيه غصب عنك لقدام.. ف بتلاقي نفسك بتكبر وبتعجز..

هييجي واحد ذكي يسألني طب ليه احنا بنتحرك فيه لقدام مش لورا؟

هقولك عشان القواعد الفيزيائية للكون اللي احنا عايشين فيه كده.. هو بيتحرك في الاتجاه ده لوحده منذ بدء الزمن، لإنه كون عادي أو (موجب Positive)، مش كون مضاد أو (Negative)..

هيسألني سؤال تاني ذكي بردو، ويقولي طب ليه احنا بنعجز وبنموت لما الزمن بيمر لقدام؟.. ليه مثلا الحاجة بتبوظ لما تقدم.. ليه مثلا مش بتصغر أو تبقى أقوى مع مرور الزمن.. إشمعنى؟..

سؤال ذكي فعلًا، وهجاوبك باختصار..

عشان في حاجة في قواعد الفيزياء الكونية، وبالتحديد في علم الديناميكا الحرارية Thermodynamics إسمها القصور الحراري أو الإنتروبي Entropy..

طب ايه الإنتروبي دي باختصار عشان صعبة جدًا ومحتاجة مقال كامل لوحدها ؟..

الإنتروبي دي بتوصف خصائص المادة في إنها دايمًا بتميل للتحول من النظام لعدم النظام..

طب يعني ايه؟.. يعني ببساطة مثلا، انت لو عندك مكتب، ومرتب الورق والأدوات بتاعتك عليه كويس جدًا، وتخيلت انك بتستخدمه كل يوم، وانك مش بتروقه ولا بترتبه خالص ولا بتهتم بيه.. مع مرور الوقت هتلاقي ان المكتب الأنيق المرتب ده، هيتحول من حالة النظام بتاعته دي، لحالة فوضى أو Chaos.. هتلاقي الاقلام مرمية على جنب، والورق مرمي فوق بعضه، وفيه جاكت وقميص مرميين ع الكرسي، وحاجة ف منتهى القذارة يعني

طب ايه علاقة ده بينا؟.. علاقته بإن ده نفس اللي بيحصل في الذرات المكونة لأي نظام فيزيائي، بما فيهم أجسام الكواكب والنجوم، وحتى الكائنات الحية نفسها، بما فيهم البشر..

الذرات والخلايا الحية اللي جوه أجسامنا مع مرور الوقت بتتحول من حالة النظام Order لحالة الفوضى Chaos..

مع الوقت بتلاقي خلاياك بقت فوضوية، وبتبوظ وتتدمر.. زي ما تكون بتستعمل عربية بقالك كتير.. عربية مثلا موديل سنة ٥٠ ومفيش حد بيصلحها ولا بيهتم بيها.. هتفضل تبوظ مع الوقت لحد ما هتقف خالص.. وفي حالة البشر، الجسم هيفضل يبوظ مع الوقت لحد ما تنتهى عملية الإنتروبي بالموت..

دي القواعد اللي بتكون الكون بتاعنا اللي احنا عارفينه.. هو مخلوق كده..

طب تعالى نرجع لموضوعنا.. كنا بنقول ايه؟..

آه.. كنا بنحاول نتخيل البعد الرابع..

حاولت ترسم الخط اللي بزاوية ٩٠ من كل زاوية في المكعب؟.. معرفتش صح؟

طب ليه؟.. عشان الزمن نفسه هو كإنه ضلع خارج من العالم بتاعنا ثلاثي الأبعاد ده، ورايح في اتجاه إحنا مش شايفينه ومعندناش القدرة على استيعابه..

زي بالظبط الدايرة والمثلث لما ما كانش عندهم القدرة انهم يبصوا (فوق) عشان يشوفونا.. عشان هما معندهمش فوق في عالمهم اصلا.. مش احنا اتفقنا على كده؟..

طيب.. إحنا بقى بردو عندنا إتجاه إحنا مش شايفينه بردو.. الإتجاه هو (الماضي Past) و(المستقبل Future)

دول كده بالنسبة لينا كبشر، أو بالنسبة لأي كائن ثلاثي الأبعاد عمومًا، عاملين زي (فوق Up) و (تحت Down) بالنسبة لأي كائن ثنائي الأبعاد..

مبنقدرش نشوفه الزمن ده ولا نعرف تكوينه ولا اتجاهه، ولا نتحرك فيه لقدام ولا لورا زي باقي الأبعاد بتاعتنا.. كل اللي بنشوفه بس هو تأثيره علينا، من خلال موقعنا على الخط بتاعته.. كل ما بنتحرك عليه لقدام (بنكبر أو بنعجز).. ولو افترضنا اننا اتحركنا على الخط بتاعه لورا، هنلاقي إننا (بنصعر وبنرجع شباب تاني)..

فاهمني ؟!

الزمن نفسه هو وهم نشعر به أو نحسه، بسبب حركتنا المستمرة على خط بعد علوي رابع، عقولنا نفسها غير مؤهلة لإستيعاب حقيقته الكاملة!!

سبحان الله

طب تعالى كده نتخيل نفس القصة اللي احنا حكيناها على المثلث والدايرة.. بس نحكيها على كائنات بشرية زينا، ونطبقها بنفس الشكل..

هنتخيل إن في واحد بيحب واحدة.. بس الواحدة دي عندها كانسر، ورفضته عشان هي عندها شهر واحد بس تعيشه، ومش عايزة شفقة من حد..

قام الواد الزبالة ده راح اتجوز واحدة تانية وشغل أغنية عشان تبقي تقولي لأ بتاعت تميم يونس .. ف البنت قعدت تعيط وتدعي وتقول يا رب أنت اللي شايف اللي جوايا..

هل ده حقيقي؟.. حقيقي آه..

حقيقي (حرفيًا) أو بمعنى الكلمة!!

الكائن العلوي، أو اللي عايش في بعد أعلى منك Higher Dimension أو Higher Plain، هيبقى كائن متكون من ٤ أبعاد مساحية، مش ٣ بس..

طب بالراحة بقى وركز معايا أوي عشان لو تهت مني مش هتفهم..

أول حاجة خليني أقولك يعني ايه بعد مساحي.. البعد المساحي ده بيعبر عن المساحة.. زي الطول كده والعرض والارتفاع.. تخيل ان في بعد رابع زيهم كده، بس هو احنا منعرفش شكله ولا اتجاهه عشان احنا بنشوف التلاتة الأوائل بس..

طب هو مش احنا قايلين البعد الرابع هو الزمن؟!!

مش بالظبط..

الزمن هو (التأثير أو ال Effect) بتاع حركتنا على خط البعد الرابع في الفضاء

عارف انك تعبت وعايز تشتمني، بس هبسطهالك..

تخيل انك في الفضاء بتتحرك لقدام مثلا.. طاير ف الفضاء لقدام.. انت عارف ان الكواكب كلها بتتحرك في الفضاء وبتسافر لمئات الكيلومترات في كل ثانية، بس انت مش بتحس بده.. صح؟

حركتك دي هي اللي بتخلي الزمن يعدي.. عشان انت بتتحرك على خط الزمن.. ف الوقت بيمر عليك لقدام.. لكن لو انت وقفت، وبعدين اتحركت لورا، هتلاقي الزمن أو التأثير بتاع حركتك ده، بيعدي عليك لورا..

يعني دلوقتي البعد الرابع ده هو اتجاه غير مرئي بالنسبالنا.. زي (فوق) كده بالنسبة للكائنات اللي في العالم ثنائي الأبعاد..

ولو في كائن علوي خارق عايش في البعد الرابع ده، ف هو بطبيعة الحال هيبقى عنده القدرة على استيعاب الخط المساحي الرابع اللي بعد الطول والعرض والارتفاع..

وبالتالي هو هيبقى شايف البنت اللي بتعيط وبتدعي من اتجاه هي مش قادره تستوعبه.. شايفها من فوق، بس (فوق Up) بتاعه، مختلف عن (فوق) بتاعنا احنا..

هو هيبقى شايفها من جوه ومن بره حرفيًا!!

يعني هيبقى شايف هدومها، وشايف بشرتها أو جسمها من بره من غير هدوم، وشايف الأعضاء والدم اللي جوه جسمها، وشايف الكانسر اللي موجود جوه الجسم في نفس الوقت

هيبقى شايف العالم بتاعنا كله زي الورقة كده.. شايفه كله، وشايف كل اللي بيحصل فيه، وشايف اللي البشر بيفكروا فيه أو اللي مخبيينه جواهم، أو جوه الخزانات بتاعتهم مثلًا، بيحصل قدامه في نفس اللحظة!!

ومش بس كده.. هيبقى كمان شايف الماضي والمستقبل بتاعنا كله قدامه زي المسطرة الطويلة كده..

يعني لو بص لورا شوية ع المسطرة، هيشوفك وانت صغير لسه مولود وبترضع.. ولو بص على آخر المسطرة كده، هيشوفك وأنت عجوز وبتموت.. وهيكون شايف جسمك نفسه من جوه وهو أعضاءه بتتوقف، وهيبقى شايف المرض اللي جواك بعينه المجردة..

هيبقى عارف حتى اللي انت بتقوله في سرك، لإنه شايف جواك انت نفسك!!

أنت متخيل اللي انا بقوله وقادر تستوعبني؟ عارف ان الموضوع صعب، بس عندي ثقة إنك قادر تستوعب ده كله..

العالم رباعي الأبعاد الغريب ده، كل حاجة فيه حرفيًا غريبة ومختلفة عن اللي احنا نعرفه..

على سبيل المثال.. الورق عندهم هو ثلاثي الأبعاد، مش ثنائي زي عندنا بيكتبوا بخط ثلاثي الأبعاد له طول وعرض وارتفاع أو سُمك، كإنه عمود من الحبر مثلًا، مش خط ثنائي له طول وعرض زي عندنا!!

كمان معندهمش مجرد الأشكال ثلاثية الأبعاد بتاعتنا دي بس.. عندهم أشكال هندسية رباعية الأبعاد هي مثلا اللي بيستعملوها في الصناعات بتاعتهم.. مثلًا المكعب رباعي الأبعاد إسمه (تيسراكت Tessaract) هتلاقي شكله التخيلي في عالمنا في تاني كومنت تحت..

ليه بقولك شكله التخيلي؟!!.. لإننا منقدرس نرسم شكل هندسي حقيقي رباعي الأبعاد في عالم ثلاثي الأبعاد اللي إحنا بنرسمه هو نموذج للضل أو الشادو Shadow بتاعه في العالم بتاعنا..

ضل إيه يا عم الحج؟! مش فاهم حاجة

تعالى أفهمك..

تعالي نتخيل الموضوع كله تاني على العالم ثنائي الأبعاد اللي كنا بنتكلم عليه..

أنت لو حاطط قدامك ورقة، ومسلط عليها مصدر ضوئي أو لمبة مثلًا.. وبعدين جيت جبت كورة (ثلاثية الأبعاد) ليها طول وعرض وارتفاع، وحطيتها قدام اللمبة.. ايه اللي هيحصل؟.. جرب كده معايا وانت بتقرا..

اللي هيحصل هو إن الكورة دي هترمي ضل ثنائي الأبعاد على الورقة.. ولو احنا عايزين نرسم كورة ثنائية الأبعاد هتطلع ايه؟..

هتطلع دايرة..

نفس الكلام على المكعب.. لو جبت مكعب وحطيته قدام اللمبة، هيرمي ضل مربع على الورقة..

فاهمني؟.. طيب كويس.. طبق بقى الكلام ده على العالم ثلاثي الأبعاد..

لو جبت مكعب رباعي الأبعاد أو (تيسراكت Tesseract) وحاولت تتخيله في عالمنا، ف انت هتتخيل الضل بتاعه في العالم بتاعنا.. هيطلع شكله مكعب عادي، بس بيتحرك بطريقة غريبة.. هتلاقوا فيديو ف تاني كومنت للحركة أو ال Rotation بتاعت المكعب رباعي الأبعاد دي

نفس الكلام على المثلث رباعي الأبعاد أو ال (بينتاكورون Pentachoron).. لو حطيته قدام مصدر ضوئي ف العالم رباعي الأبعاد، هيرمي ضل ثلاثي الأبعاد في العالم بتاعنا، وهيبقى شكله هرم عادي هتلاقوا فيديو ليه وهو بيتحرك أو ال Rotation بتاعه في الكومنت التالت

طبعًا في أشكال رباعية الأبعاد كتير جدًا مش هنتكلم عنها كلها هنا، بس ممكن تشوفوا حركتها وتفهموها أكتر في الفيديو اللي هيبهركم ده :

طيب.. نيجي بقى للحتة الشائكة.. السر الأعظم..

هل ممكن يكون الرب أو الإله اللي إحنا بندعيله ده، وبنتخيله حسب الأديان، إنه كيان فائق القدرات، و (على كل شيءٍ قدير)، يكون كائن علوي أو رباعي الأبعاد؟..

لأ الكيان ده عشان نقدر نطلق عليه لقب إله، لازم يكون عايش في أعلى بعد ممكن.. اللي هو البعد ال 11 !!

ثانية.. هو في بعد 11 ؟!!

أيون حسب افتراضات نظرية الأوتار الفائقة Superstring Theory، وجزئيات في ميكانيكا الكم Quantum Mechanics، ف الكون بيتكون في الواقع من 11 بعد مساحي مختلف!!

وحسب افتراضات أخرى متفرعة من نفس النظرية، ف هما 26 كمان.. مش مجرد 11 !

والبشر بيقدروا على استيعاب 3 بس، وبيحسوا بحركتهم خلال الرابع من خلال مرور الزمن

فبالتالي لو تخيلنا ان في كائن عايش في البعد الرابع، ف هو هيبقى قادر يستوعب ٤ أبعاد بس، وبيحس بحركته في الخامس من خلال حاجة غريبة كده هكلمكم عنها بعدين..

المهم إن الكائن رباعي الأبعاد ده هيبقى كائن بردو برغم قوته الأسطورية دي، بس بردو ضعيف وقاصر عن الوصول للقدرة الإلهية الكاملة لله سبحانه وتعالى..

طب إزاي؟.. مثلًا هو مش هيقدر يغير الكون.. مش هيقدر يخلق حاجة من لا شيء.. هو اه يقدر يستوعب البعد العلوي الرابع، وتأثيره اللي هو الزمن.. ويشوفه من البداية للنهاية.. بس ميقدرش على تغيير الكون أو الاختيارات اللي بيعملها البشر جواه

بس ممكن الكائنات رباعية الأبعاد دي نتخيل إنها هي الجن والملائكة اللي ربنا سبحانه وتعالى كلمنا عنها

فكروا كده معايا..

١- كائنات بتشوفنا ومبنقدرش نشوفها.. يعني هي ممكن تكون شايفانا من اتجاه احنا مش مدركينه..

٢- كائنات حسب القرآن ليها قدرات فائقة. بتقدر تنط كن مكان لمكان في لمح البصر.. بتقدر تشوف الغيب حسب مشيئة الله سبحانه وتعالى.. الغيب اللي هو خط الزمن نفسه، أو خط البعد المساحي الرابع..

٣- كائنات بتقدر تتجسد في عالمنا من العدم حرفيًا، بس احنا بنشوف ضلها اللي بيبقى ثلاثي الأبعاد أقرب لفهمنا، مش شكلها الحقيقي رباعي أو خماسي الأبعاد، لإننا منقدرش نستوعب شكلها الحقيقي، عشا مش هنشوف أكتر من ٣ أبعاد بس !!

هتسألني ازاي بيعملوا النقطة التالتة دي؟.. هقولك بسيطة.. تعالى نتخيل مع بعض على مثال العالم ثنائي الأبعاد 2D بتاعنا..

تعالى نتخيل إنك معاك كورة.. وعايز تعدي أو تمرر الكورة دي من خلال العالم ثنائي الأبعاد.. هتعمل كده إزاي؟!

إحنا قلنا ان ضلها بس هو اللي هيظهر، أو نقاط التماس بتاعتها مع العالم بتاعنا..

تخيل ان الورقة دي شفافة وغير مادية.. وعدي منها الكورة كده.. وركز معايا أوي وحاول تتخيل اللي هيحصل..

أول ما الكورة تلمس الورقة، هتلاقي نقطة التماس بتاعتها دي ظهرت في العالم ثنائي الأبعاد.. كإن فجأة في نقطة ظهرت من العدم!!

بعدين لما الكورة تمر أكتر، هتلاقي ان النقطة اللي في العالم ثنائي الأبعاد دي بدأت تكبر بسرعة وتتحول لدايرة الدايرة دي هتبتدي توسع وتوسع لحد ما هتوصل لأكبر قطر ليها، اللي هو بالظبط مركز الكورة أو منتصفها تمامًا، اللي بتعدي من الورقة أو العالم ثنائي الأبعاد!

بعد كده هتبدي الدايرة تصغر تاني عشان الكورة خلاص عدت النص.. هتفضل الدايرة تصغر لحد ما توصل لإنها تبقى نقطة مرة تانية. وبعدين النقطة دي هتختفي تمامًا زي ما ظهرت!

الكورة عدت خلاص.. It Jumped out of our plain of existence..

هتلاقي فيديو تخيلي قصير ١٣ ثانية بيشرحلك الإفتراض ده هنا عشان لو مش قادر تتخيله :

وهتلاقي في رابع كومنت تحت Gif تخيلي لشكل الكورة وهي بتعدي من العالم ثنائي الأبعاد.. وفي الكومنت اللي بعده صورة توضيحية للموضوع بص عليهم وهتفهم..

يبقى معنى كده إن الكائن العلوي ده بيقدر يتجسد في العالم بتاعنا من الصفر.. لإنه بيعبر من خلاله حرفيا.. يعني إحنا بنشوف الجزء الخارجي من سطح جسمه اللي بيعدي في عالمنا، مش جسمه كله..

والسطح الخارجي ده اللي احنا بنشوفه في عالمنا بيبقى ثلاثي الأبعاد.. يعني ممكن يتشكل في شكل بشري زينا، أو شكل مختلف تمامًا، أشبه بشكل الوحوش في أفلام هوليوود.. مش هنبقى فاهمين الشكل أصلًا.. وعشان كده هنترعب.. هنترعب جدًا

فهمتوا بقى ليه ربنا من رحمته بينا خلانا منقدرش نشوف الكائنات دي ولا نتعامل معاها؟!

لإنها لها قدرات فائقة بالنسبالنا أقوى من السحر حتى.. أقوى من الخيال.. ومش هنقدر نصمد قدامهم لحظة.. ولذلك بردو من رحمته بينا خلاهم ميقدروش يتدخلوا في عالمنا إلا بإذنه.. وميقدروش يغيروا فيه حاجة إلا بمشيئته هو وحده..

طب مثلًا حاجات زي رحلة الرسول عليه والصلاة والسلام اللي ذكرتها نصوص القرآن الكريم بإسم (الإسراء والمعراج).. حاجات زي قصة الأنبياء مع الجن.. قصص قوم يأجوج ومأجوج والأماكن اللي هما مستخبيين فيها..

ماهية الله سبحانه وتعالى نفسه، وكيفية استيعابنا له باستعمال قواعد الفيزياء والأبعاد اللي احنا شرحناها دي.. من هو الرب، وما هو كيان الخالق ذاته؟!!

هل صح أصلًا إننا نسأل الأسئلة دي، ولا احنا كده بنشطح بخيالنا وتفكيرنا أوي؟!!

طب إيه هو البعد الخامس والبعد السادس والسابع والثامن وكل الأبعاد الفوقية دي؟!!.. إيه ماهيتها وبتتكون من إيه، وإيه علاقتها بسر الخلق، ومفتاح عظمة الخالق العظيم الجليل نفسه؟!

كل دي أسئلة هنجاوب عليها في الجزء الثاني من المقال، اللي هيصدر كمان يومين بإذن الله.. ف خليكم متابعين عشان اللي جاي أقوى وأكثر غرابة وعظمة بما لا يقاس

(((تعديل: الجزء الثاني من المقال صدر بالفعل.. وهو يعتبر أول وأكبر مقال يعرض مواضيع شديدة الطموح والخيال لم يتحدث عنها أحد باللغة العربية من قبل.. أتمنى أن تقرأه للآخر برغم طوله، وأعدك إن تفكيرك سيتغير تمامًا بعده.. ومستني رأيك المقال هنا

https://m.facebook.com/story.php?story_fbid=2992203447526435&id=100002104278915)))

وبإذن الله من هنا ورايح، هيبقى في شعار بالنسبة لمقالات محمود علام العلمية والفيزيائية، وكمان شعار لبرنامج #فيزيكس_بالعربي اللي هيبقى الحلقة الجاية منه بتتكلم عن نفس موضوت مقال النهارده بشكل مبسط أكتر.. متنسوش تتابعوها..

الشعار ده هو (#إفهم_فيزيكس)

الشعار ده بيرمز لمشروعي في تثقيف الناس والعامة من غير المتخصصين في علوم الفيزياء النظرية العظيمة وكل المتفرع منها من علوم رائعة.. المشروع اللي بيهدف لإحداث فرق حقيقي في الثقافة الإجتماعية بتاعتنا كمصريين وكعرب..

المشروع ده أنا مستمر فيه سواء من خلال المقالات العلمية دي، أو سلسلة مقالات التكنولوجيا المبسطة #كبسولات_تكنولوجية اللي صدر منها حوالي ٣٤ كبسولة قبل كده، أو الكتب العلمية زي #الله_لا_يرمي_النرد الأكثر شهرة، أو الكتاب العلمي الجديد اللي جاي قريب..

ده غير برنامجي الأصلي اللي بقدمه على يوتيوب تحت إسم #فيزيكس_بالعربي..

كل ده عشان نقدر #نفهم_فيزيكس

ف لو المقال ده، والمشاريع العلمية الثقافية دي كلها عجبتكم، وحابين تتابعوا منها أكتر في الأيام اللي جاية، وتساعدوني في نشرها بين الناس زي ما أنا بتمنى، يمكن نقدر نعمل فرق وتغيير وننور ظلام الجهل بضوء المعرفة، أتمنى إنكم تعملوا شير للمقال ده، ولكل اللي جاي، وتكتبوا عليه شعار #إفهم_فيزيكس

الشير بتاعكم مش هياخد من وقتكم لحظات، بس هو هيساعدني في نشر المشروع ده أكتر من ما تتخيلوا.. ف متبخلوش بدعمكم على المجهود ده، لو شايفينه يستحق

إشتركوا في قناة برنامج #فيزيكس_بالعربي الأصلية على يوتيوب من هنا وانتظروا الحلقة الثالثة قريب..

متنسوش تسيبوا رأيكم وتحليلاتكم في الكومنتات تحت وإنتظروا الجزء الثاني من المقال قريبًا.

شكرًا

البوستر تصميمي الخاص ودي صفحة التصميمات الرسمية بتاعتي:

مصادر لم أستعملها شخصيًا لكن ممكن تفهموا منها أكثر: