تفتكر هتصدقني لو قلتلك إننا كبشر، قريب جدًا هنقدر نوصل لتقدم تكنولوجي كافي، يخلينا نصنع (هيكل Shell) يحوط كوكب كامل، ونملاه بجو كوكبنا الأرضي ؟!.. أكيد ممكن تكون ما استوعبتش.. اللي أنا بقولهولك باختصار، اننا قريب هنقدر نحوط كواكب كاملة، بهياكل صناعية، ونحول جوها وجغرافيتها الداخلية، لظروف شبيهة بالأرض.. كوكبنا الأم 
إزاي ؟.. هو ده موضوعنا ف كبسولة النهارده 
المرة اللي قبل اللي فاتت، كلمتكم عن تكنولوجيا ال Terraforming، اللي هي بنحول فيها الكواكب مناخيًا وبيئيًا، لظروف شبيهة بالأرض، عشان نقدر اننا نعيش عليها، ونستوطنها.. كلمتكم عن طرق كتير، بس في طريقة معينة فضلت إني أسيبها في كبسولة لوحدها، بسبب عظمتها المبالغ فيها الطريقة دي هي (العوالم الهيكلية Shell Worlds).. خلوني أشرحلكم ايه دي بالظبط..
اللي احنا متوقع إننا نعمله قريب، حسب علماء في وكالة ناسا لأبحاث الفضاء، ومهندسين فضائيين في مختلف المختبرات البحثية في جميع أنحاء العالم، هو شيء بسيط.. حاجة سهلة نظريًا علينا، وممكن فعلًا نعملها بالتكنولوجيا الحالية..
الحاجة دي هي إننا هنبني على مستوي فضائي شديد الضخامة، قشرة صناعية، متكونة من الصلب Steel والتراب Dirt ومادة الكيفلار Kevlar.. القشرة دي هتتبنى على مستوى فضائي، وهتكون محيطة بالكوكب بأكمله!.. أيوه زي ما سمعتم.. هنبني قشرة فضائية صناعية حوالين كوكب المريخ كمثال، تحيط بالكوكب بأكمله 
عارف إن الموضوع صعب على الإستيعاب والتخيل، ولسه الموضوع هيبقى مذهل أكتر.. اللي هيحصل بعدها إننا هنملا الفراغ اللي هيكون بين القشرة الفضائية دي، وسطح الكوكب نفسه، بغلاف جوي صناعي، من تصميمنا إحنا!.. يعني مثلًا، هنختار نوع الغلاف الجوي اللي احنا عايزينه، وليكن مثلًا (غلاف جوي أرضي)، وندوس على زرار ال Enter.. اللي هيحصل إن تلقائيًا، الكوكب ده هيتحول مناخيًا لأرض تانية بنفس الصفات المناخية اللي على كوكب الأرض، بعيدًا عن الجاذبية طبعًا.. وكمان بعيدًا عن الشمس، لإن الشمس مش هتكون موجودة، بسبب إن القشرة الصناعية الفضائية دي هتكون بتحجبها عن الكوكب.. وعشان كده هتكون الإضاءة اللي على الكوكب صناعية، مبنية بداخل إطار القشرة الفضائية نفسها.. وهيكون لها نفس خصائص ضوء الشمس المفيدة، ومن غير أضرار كمان، على عكس الشمس
الإنجاز التكنولوجي الهائل ده ممكن يحول الكوكب موضوع التجربة بتاعنا، لكوكب صالح تمامًا للحياة البشرية، بل وأكتر من كده، هيقدر يدينا فوائد وخواص، مش موجودة ف كوكبنا نفسه، زي مثلًا :
١- المشاريع الصناعية العملاقة، و وكالات الطيران والفضاء، وأي مشروع صناعي عملاق محتاج للفضاء، هيتم بناءه على القشرة الصناعية الخارجية دي، من بره!.. يعني المصانع و وكالات الأبحاث الفضائية وما شابهها، هتتبني بره الكوكب نفسه، وبره حدود السماء.. وده هيديها امتيازات إنها منها للفضاء علطول بدون الحاجة لإطلاق صواريخ أو ما شابه، وكمان مش هيكون في مخلفات صناعية على سطح الكوكب نفسه من جوه.. يعني هنقضي على التلوث البيئي
٢- الأشعة الفوق بنفسجية الضارة اللي بتيجي من الشمس، مش هتوصل لسطح الكوكب، ولا للبشر، بسبب إن القشرة الصناعية دي هتحجبها عننا.. وبالتالي مش هيكون في أمراض جلدية أو سرطان جلدي من المسببات دي..
٣- الحرارة بتاعت الكوكب، وطول اليوم نفسه، وتعاقب الليل والنهار، مش هيكونوا معتمدين على الشمس يعني ممكن نطول ف اليوم أو نقلله زي ما احنا عايزين، وممكن نجيب النهار أو الليل وقت ما نحب.. كمان ممكن نغير الحرارة والبرودة براحتنا، كإنه تكييف عملاق، على مستوى كوني
٤- القشرة دي هتقدر تحمينا من الإشعاعات الفضائية الضارة، سواء من الفضاء نفسه، أو من الشمس
٥- الكوكب نفسه من جوه هيكون بيوفرلنا احتمالات لا نهائية عشان نبني عليه أشكال ومباني ومدن، من المستحيل اننا نتخيل وجودها أصلًا.. على سبيل المثال، ممكن نبني مدن معلقة، تكون متعلقة حرفيًا في السما، ومتدلية من القشرة الفضائية المحيطة بالكوكب دي.. ونعيش في قلب حدود السما نفسها
٦- القشرة الصناعية دي هتمنع تسرب الغلاف الجوي الصناعي ده للفضاء، بسبب ضعف جاذبية الكوكب.. هتحتويها لجوه، وتحافظ عليها من التأكل لأي سبب كان، وهتلغي تمامًا أي احتمالية لحدوث ظواهر زي الاحتباس الحراري، أو كوارث زي النيازك والمذنبات..
كواكب زي المريخ و شبه كوكب بلوتو مرشحة بقوة للعملية دي.. المريخ مثلًا الجاذبية عليه هي تلت الجاذبية الموجودة على الأرض.. وده هيدينا القدرة على اننا كبشر، نستخدم أجنحة صناعية، ونطير حرفيًا عليه 
يعني مش هيكون في طيران تجاري.. إحنا اللي هنطير بأجنحة صناعية، بسبب ضعف الجاذبية
طبعًا الوصول لتصميم العوالم الهيكلية دي، والنجاح فيها هيتطلب مجهود خارق وغير طبيعي، أولًا عشان نبني القشرة الصناعية دي في الفضاء حوالين كوكب كامل، وثانيًا عشان نقدر ننقل كميات كافية من النيتروجين والماء لسطح الكوكب ده، عشان نستخدمها في إننا نصنع غلاف جوي شبيه بالأرض.. بس هي أسهل بكتير من طرق ال Terraforming الطبيعية.. على سبيل المثال، إحنا هنحتاج ل ٥٠% من كتلة الغلاف الحوي الموجود على الأرض، لو حبينا نحول كوكب كامل زي المريخ مناخيًا بالطرق التقليدية اللي اتكلمنا عنها قبل كده.. إنما لو التحويل ده هيتم باستعمال القشرة الصناعية، فإننا هنحتاج ل ٦% فقط من كتلة الغلاف الجوي الأرضي!.. كمية سهلة جدًا ونقدر نديرها ونتعامل بيها بالتكنولوجيا الحالية كمان
تخيلوا انتم.. تخيلوا المستقبل مخبي ايه.. تخيلوا إن أولادكم يتولدوا على كوكب تاني، متحوط بقشرة صناعية فضائية مضيئة، الجو العالمي اللي بيعيشوا فيه بيتعدل حرارته صناعيًا زي التكييفات بالظبط، وعايشين على مدينة متعلقة فوق السحب، وبيتنقلوا بين المدن والأحياء، وهما طايرين بأجنحتهم الصناعية.. وكمان بيقدروا يطلعوا من الكوكب في أي وقت، بأسانسيرات تنقلهم عبر القشرة الصناعية، خلال بوابات مخصصة لكده، وتنقلهم للفضاء الواسع 
ده مش خيال.. ده المستقبل المستقبل بإحتمالاته اللانهائية
المهم.. لو الكبسولة عجبتكم، أرجوكم تفاعلوا عليها واعملوها شير في كل مكان تقدروا عليه.. ده هيبينلي تقديركم للمجهود اللي ببذله في تقديم المعلومات دي كل يوم، وتبسيطها بالمنظر المرهق ده، وهيساعدني في نشرها ما بين الناس بالشكل اللي بحلم بيه، وعشانه بدأت الموضوع ده في الأساس.. الشير مش هياخد ثانية من وقتكم، وهيساعدني كتير فوق ما تتصوروا
ده بالإضافة لإن الشير مفيد لعضلة القلب حسب آخر أبحاث وصلتلها انا وصحابي عندي في الاوضة 
الكبسولة النهارده بتنتمي لفئة (التحويل المناخي والهندسة الفضائية Terraforming and Space Engineering).. ابقوا دوروا عليها ف جوجل لو حابين تعرفوا اكتر عن مواضيعها، ومتنسوش تبصوا على شكل العوالم الهيكلية التخيلي في الصور اللي في الكومنتات 
هتتبسطوا وخيالكوا هيسرح لبعيد أوي 
حاجة كمان. الكبسولات بتصدر في أيام (الأحد – الثلاثاء – الخميس) من كل أسبوع، الساعة ٧ مساءًا.. عشان تكون مركزة أكتر، وتاخد وقتها معاكم في القراءة والبحث.. يا رب تعجبكم
شكرًا ليكم على حسن استماعكم ومنتظر آرائكم في الكومنتات
بوستر : محمود علام
مصادر ممكن تستفيدوا منها أكتر :
https://www.space.com/23063-terraforming-planets-shell…
https://www.space.com/23082-shell-worlds-planet…
https://www.universetoday.com/tag/shell-worlds/
#محمود_علام
#كبسولات_تكنولوجية
#كبسولة_16
رابط المنشور الأصلي: هنا